អន្តរជាតិ៖ អ៊ីស្រាអែលនៅតែបន្តវាយប្រហារទៅលើទីតាំងមួយចំនួននៃតំបន់ហ្គាហ្សាបន្ថែមនៅយប់ថ្ងៃសៅរ៍ម្សិលមិញនេះ ដែលរួមទាំងទីក្រុង Rafah ខណៈអ៊ីស្រាអែលបានបញ្ជាឱ្យមានការជម្លៀសមនុស្សចេញពីតំបន់នេះកាន់តែច្រើនឡើង ស្របពេលដែលអង្គការសហប្រជាជាតិឯណោះវិញព្រមានថា ការលុកលុយភ្លាមៗនៃទីក្រុងដែលមានហ្វូងមនុស្សយ៉ាងសម្បើមនេះ ពិតជាមានការប្រថុយនឹងគ្រោះមហន្តរាយដ៏ធ្ងន់ធ្ងរបំផុត។
ប្រភពពីអ្នកសារព័ត៌មាន AFP មន្រ្តីសុខាភិបាល ព្រមទាំងសាក្សីនៅក្នុងតំបន់ហ្គាហ្សាផ្ទាល់បានរាយការណ៍ថាមានការវាយប្រហារនៅទូទាំងតំបន់នេះ ខណៈអង្គការសហប្រជាជាតិអះអាងថាការផ្តល់ជំនួយមនុស្សធម៌ចូលទៅកាន់តំបន់ហ្គាហ្សាត្រូវបានរារាំង បន្ទាប់ពីទាហានអ៊ីស្រាអែលនៅតែបាន និងបន្តផ្គើនទៅលើក្រុមមជ្ឈដ្ឋានអន្តរជាតិដែលប្រឆាំងនឹងប្រតិបត្តិការរបស់ខ្លួន ព្រមទាំងបានចូលទៅដល់ភាគខាងកើតនៃទីក្រុង Rafah ទៀតផងនៅក្នុងសប្តាហ៍នេះ។
គួរបញ្ជាក់ថា សកម្មភាពរបស់កងកម្លាំងអ៊៊ីស្រាអែលបានជះឥទ្ធិពល និងកាត់ផ្តាច់តម្រាយផ្លូវដឹកជញ្ជូនជំនួយចូលទៅកាន់តំបន់នេះ និងផ្អាកចរាចរណ៍តាមបណ្ដាផ្លូវសំខាន់មួយចំនួនទៀត។ សេចក្តីថ្លែងការណ៍មួយរបស់មន្ទីរពេទ្យ Al-Aqsa Martyrs ក្នុងទីក្រុង Deir al-Balah ឱ្យដឹងថា មានមនុស្សយ៉ាងហោចណាស់ ២១ស្លាប់ក្នុងហេតុការណ៍វាយប្រហារកាលពីយប់មិញ និងមានមនុស្សរាប់សិបនាក់ផ្សេងទៀតត្រូវបានដឹកទៅកាន់មន្ទីរពេទ្យ។
នៅក្នុងទីក្រុង Rafah ឯណោះវិញ សាក្សីផ្ទាល់បានរាយការណ៍ពីការវាយប្រហារផ្លូវអាកាសយ៉ាងខ្លាំងក្លានៅជិតផ្លូវឆ្លងកាត់ជាមួយប្រទេសអេហ្ស៊ីប ខណៈប្រភពផ្សេងទៀតបានអះអាងពីការវាយប្រហារដោយឡែកមួយនៅភាគខាងជើងតំបន់ហ្គាហ្សាផ្ទាល់។ ក្រុមហាម៉ាស់កាលពីថ្ងៃសៅរ៍បានចោទប្រកាន់លើកងកម្លាំងអ៊ីស្រាអែលពី "ការពង្រីកការលុកលុយចូលទៅក្នុងទីក្រុង Rafah ជាពិសេសការក្តោបក្តាប់លើតំបន់សំខាន់ៗមួយចំនួននៅចំណុចកណ្ដាល និងភាគខាងលិចនៃទីក្រុងនេះ"៕
